Ayiti-Enjistis: Machann viktim nan Jeral batay yo denonse tout zak enjistis y ap sibi.

0
81

Redaktè: Maurant Jamesky

Jodi Jedi 13 fevriye 2020, Avoka k ap defann machann ki viktim abi konfyans ak pouvwa nan zòn Jeral batay yo denonse sitiyasyon difisil sitwayen sa yo ap konnen anba men majistra nimewo 1 komin Taba a Nice Simon nan kad yon pwojè konstriksyon kay pou machann yo.

Mèt Arnel Rémy nan entèvansyon l fè konnen machann sa yo depanse 150 ak 300 mil dola ht pou yo rive benefisye Kay sa yo, dapre negosyasyon yo te fè ak majistra Taba.
Selon mèt Arnel , majistra Taba a ta entèdi sitwayen sa yo mete pye sou espas ki ta dwe pou yo an malgre kontra yo siyen ak meri a ki montre pwopryete sa yo se pou ti machann sa yo.

Avoka k ap defann ti malere ak malerèz sa yo kondane tout zak briganday ak menas machann sa yo ap sibi anba men kèk polisye k ap travay ak majistra a, nan sans sa li denonse konpòtman komisè gouvènman Kwadèboukè a ki ta anpeche lajistis tande majistra a ak konplis li yo akoz, dapre li, li konfiske demand envitasyon an nan Kad dosye sila, selon mèt la se akoz akwentans politik li genyen ak akize yo.

Mèt Arnel Rémy fini pou l mande dwayen tribinal premye enstans Kwadèboukè a poze sele sou tout konstriksyon nan moman nan zòn Jeral batay la, yon fason pou sitiyasyon sa pa debouche sou yon konfli sanglan.

Yon lòt kote machann sa yo ki pat kapab kenbe dlo nan je yo, denonse tout arestasyon ilegal, selon yo, premye majistra komin Taba òdone pou fè sou yo, daprè viktim yo, se sa yo genyen yo vann pou yo rive benefisye kay sa yo. Nan sans sa , yo mande otorite konsène yo pran desten yo an men pou yo rive rekipere kay yo ki sezi.

LEAVE A REPLY

Please enter your comment!
Please enter your name here