AYITI- KRIZ: ROCH kontinye preche dyalòg pou sove Ayiti.

0
76

Redaktè: Jacques Smith

Aprè plizyè lane li fè ap goumen pou chavire pouvwa anplas la, yon objektif ki pa rive abouti jan li te swete l la finalman pati politik Regwoupman Òganize pou Chanje Ayiti (ROCH) chanje pozisyon kote y ap pwone yon vrè dyalòg ak tout sektè yo nan peyi a yon fason pou rezoud ansanm pwoblèm k ap sakaje nasyon an.

Prezidan ROCH la, Evens Toussaint di li konstate peyi a tonbe nan yon kriz ki jeneral jounen jodi a ki menase lavi ak byen popilasyon an. Militan politik la fè konnen gen nesesite pou aktè konsène yo aji san pèdi tan pou sove enterè tout ayisyen, selon sa li fè kwè, kriz sila ki blayi nan tout kò sosyete a, montre feblès sistèm sosyo-politik ki enstale nan peyi a depi 1806 rive jouk jounen jodi a.

Nan sans sa ansyen opozan fawouch pouvwa anplas la, Evens Toussaint fè kwè li enpòtan pou tout pitit peyi a kole tèt yo ansanm pou sove peyi Dayiti. Li pwofite okazyon an pou mande Prezidan Repiblik la, Jovenel Moïse mete kanpe prese prese yon nouvo gouvènman nan tèt peyi a pou kapab frennen fenomèn ensekirite peyi a ap fè fas depi plizyè tan.

Evens Toussaint fè apèl ak tout ansyen kòlèg li yo nan Opozisyon kèlkeswa ideyoloji politik yo pou vin mete men pou rezoud kriz malouk sila k ap ravaje peyi a epi travay pou bay peyi a yon lòt konstitisyon ki dwe reponn ak bezwen pèp Ayisyen an.

Pou fini, Prezidan ROCH la fè divès rekòmandasyon avèk aktè yo. Li ankouraje chèf Leta nasyon an: monte yon gouvènman san pas pouki, Òganize eleksyon lib e onèt andedan peyi a, libere tout prizonye politik yo. Reyalize pwosè sou lajan Petwokaribe a e Opozisyon radikal la dwe chita pale yon fason pou sove nasyon an.

LEAVE A REPLY

Please enter your comment!
Please enter your name here